Urola Kostako Hitza

AZPEITIA

2009-07-02 | 17:05:40

Etxebeltzeko BOEko etxejabeek Arau Ordezkatzaileak berriro garatzeko eskatu diete Udaleko alderdiei

Auziari irtenbidea emateko hainbat bide aztertu ondoren hartu dute erabakia kaltetuek

Etxebeltz-Izarran babes ofizialetako etxebizitza (BOE) egokitu zaienek Hirigintzako Arau Ordezkatzaileak berriro garatzeko eskatu diete Udaleko alderdi politikoei. Gainera bide horri ahalik eta azkarren heltzeko eskatu dute, «horretarako behar diren mekanismo guztiak martxan jarriz, behar diren konpromisoak hartuz eta behar den borondate politikoa ipiniz, ahalik eta epe laburrenean bukatu dadin arazo hau». Arazoari irtenbidea emango dieten hainbat bide aztertu ondoren hartu dute kaltetuek arauak berriro garatzearen aldeko erabakia. Horrez gainera, arauak berriro garatzeko aurrera eraman beharko diren pausoak eta denbora-tarteak «zehatz eta xehetasunez» islatuko dituen agiri bat egitea eta agiriaren edukia «betetzeko konpromisoa» ere eskatu dute Etxebeltz-Izarrako kaltetuen taldekoek.

Ez du erantzunik

ZUMAIA

2009-07-02 | 15:12:10

Gaztetxearen lehen urteurrena ospatzeko ekimenak abian dira

Uztailaren 9an Gaztetxeak urtebete egingo du, eta ordura bitartean ospakizun ekimenak egiten hasi dira

2008ko uztailaren 9an herriko gazte batzuk azken urteetan hutsik zegoen Erkibe Etxean sartu, eta Gaztetxe bihurtu zuten eraikina. Ordutik hamaika ekimen egin dute bertan, eta lehen urteurrenera iristeko egun batzuk falta badira ere, gaur bertan hasiko dira eurentzat hain esanguratsua den data hori ospatzen. Goizean Gaztetxea apaintzeko auzolanean aritu dira, eta 22:00etatik aurrera, berriz, biotopoari buruzko hitzaldia eskainiko du Zumaiako Natur Taldeak Gaztetxean bertan. Egunez egun egingo dituzten ekimenez gain, ordea, egun hauetan guztietan «etxebizitza eskubidearen aldeko akanpada» egingo dute Gaztetxe kanpoan, eta bertan nahiz urteurren ospakizunetan parte hartzera animatu dituzte herriko gazteak.

• I. URTEURRENEKO EGITARAUA

Ez du erantzunik

AZKOITIA

2009-07-02 | 14:13:45

Pablo Turrillas da Anaitasunako talde nagusiaren entrenatzaile berria

Anaitasunako Zuzendaritza Batzorde berriak atzo aurkeztu zuen, Txerloian

Pablo Turrillasek (Deba, 1963) zuzenduko du Anaitasuna Futbol Taldearen lehen taldea. Debarra (argazkian eskuinean, Anaitasunako lehendakari Javier Zubizarreta alboan duela) futbol jokalaria izandakoa da eta hainbat talde entrenatzen ibili da azken 15 urtetan, hala nola, Ondarroako Aurrera, Durango, Gernika, Elgoibar eta Arenas Getxo. "Ilusioz beterik eta lanerako gogoz" dator Turrillas Azkoitira eta helburu nagusi bat duela: "Anaitasuna mailaz igotzea".

Ez du erantzunik

ZESTOA

2009-07-02 | 13:24:57

«Errespetu faltagatik» eten egin du Romerok Batzar Nagusien bilera

Alazne Olaizolak legez kanporatutako ezker abertzaleko kide bati hitza ematean eten du saioa Batzarretako lehendakariak

Gaur goizean Gipuzkoako Batzar Nagusi Ibiltariak osoko bilkura izan du Zestoan. Batzar Nagusietako lehendakari Rafaela Romero sozialistak, ordea, bertan behera uztea erabaki du bilkura hori Zestoako alkate Alazne Olaizolak ezker abertzaleko Gabi Isasa "batzarkide legitimoari" hitza eman ostean. "Protokoloa hautsi dela-eta", batzarkideak aretotik atera dira. Isasak mintzaldia amaitu duenean berriro sartu dira guztiak. Romerok orduan, adierazi du Batzar Nagusien Mahaiak aho batez onartu duela "Batzar Nagusien erakundeari agertutako errespetu faltagatik" saioa bertan behera uztea.

Ez du erantzunik

AZKOITIA

2009-07-01 | 10:41:14

Inazio Uria zenari emango diote Antonio Oteiza Fundazioaren Ekintzailearen I. Saria

Ostiralean, uztailaren 3an, 11:00etan izango da ekitaldia Antonio Oteiza Gunean

Antonio Oteiza Fundazioak ETAk iazko abenduaren 3an hil zuen Inazio Uria enpresaburu azpeitiarrari emango dio sortu berri duen Ekintzailearen Saria. Ekitaldia datorren ostiralean egingo dute, Azkoitiko Aingeru Kalearen 32.ean dagoen Antonio Oteiza Gunean. Sari banaketaren ondoren, Antonio Oteizaren arte eriljiosoaren erakusketa irekiko dute bertan.

Ez du erantzunik